أحب فيك الوقت لا غابوا الناس
وأحب فيك الناس لاصرت موجود

وأحب فيك الليل لا صار هوجاس
وأحب باكر دامني فيك موعود

كيف أتنفس وأنت ماغيرك أنفاس
قيدتني وحريتي صارت قيود

كيف أجتمع بك كل مافيني أحساس
كيف أختصرت الكون بعيونك السود

وش سهرك فيني وأنا كلي نعاس
وش طولك فيني وأنا كلي حدود

أعشق جنوني فيك وأرفع بها الراس
وأنتي اللي ناقص قلتي يصير ويزود

ماهو بكيفي والضما يكسره كاس
بشرب ضماك ويرتوي يابس العود

دام الرجا لي فيك مايعرفه ياس
ليه أنتظر موتي وأنا فيك موعود