في الحقيقه والواقع .. المقارنه ثقيله على جبد الشباب .. لكن هذا شي ( لابد ) ان يكون .. عشان شبابنا المحترمين .. دايما كانو يقارنون بنات الخليج بـ هيفا ونانسي و رولا وغولا وغوريلا .. لكن جا الوقت اللي لازم يشوفون الحقيقه بعيونهم الاربع
- مهند -
يرجع من الدوام في الشركة .. يروح لـ نور .. يبوس راسها .. وبحنان يحضنها .. الللله يا حلاتهم عصافير الجنة .. يقولها :
( وحشتيني .. ما بـقدر اتحمل بُعدك عني ! بكفــي 8 ساعات بالشركة ما بشوووفـك ..! )
- شباب الخليج -
يرجع الخليجي من الدوام .. يروح لـ زوجته .. ويهه مكشر صايدته الشمس .. يدخل على زوجته لا سلام ولا كلام .. يفصخ ثيابه ويفرهم على السرير او على الشماعة .. ويزيد على برودة المكيف ويقول لزوجته :
( بسرعه حطي الغدا ميت يوووع .. المدير ذبحني بالشغل الله ياخذه ! بسررررررررعه حطي الغدا ما تشوفيني تعبان وابي اكل وانام ؟؟ )
.
.
- مهند -
نور حامل .. يا الله على الدلع ! خايف عليها من نسمة الهوا .. ويقولها :
( كلّي حبيبتي مشانك ومشان ابننا ! وديري بالك على صحتك .. وما تزعلي ابـــداً مشان البيبي ما يزعل منــــووووووب )
- شباب الخليج -
حرمة الخليجي حامل ! ومسكينه الحرمه متوحمة بـ تفاح اخضر .. عاد يقولها :
( اووووووووفففف !! شوفي لا تتوحمين فوق راسي !! بلعي تفاح احمر وانتي ساكته .. مب لازم اخضر ! اهو كله تفاح .. لا اتفلسفين علي )
.
.
- مهند -
مهند طالع مع نور السوق .. يشترون لهم ثياب.. ودار الحوار التالي :
نور : حبيبي .. شو رايك بالفستان الاحمر .. حلو مو ؟!
مهند : أيـــــــه ! حلو كتير .. بس لو لبستيه بيجنن اكتر .. انتي بتحلّي الفستان !
نور ( مستحيه ) : بحبـــــــــــك .. دخيلك منين جايب كل هالغزل هااد ؟
مهند : دخيلك انتي ! تؤبرنـــي ابتسامتييك شو حلوه !
- شباب الخليج -
الخليجي طالع مع زوجته السوق .. ما دار بينهم حوار .. ليش ؟!
لان هو يمشي قدام .. وهي وراه تركض ..
وكل اللي قاله ( بسرعه خلصي .. ابى ألحق على الربع ) !
.
.
- مهند -
قام من النوم نص الليل .. ما شاف زوجته عداله.. جان يخاف .. راح يدورها ويحاتيها .. ويوم لقاها رايحه تشرب ماي بالمطبخ .. قال لها
( لِـــك ! شغلتي بالي عليكــي .. وين كنتي ؟! بتشربي ميّ ؟! بالهنا حبيبتي مطرح ما يسري يمري )
- شباب الخليج -
قام من النوم نص الليل .. ما شاف زوجته عداله.. فتح الليتات .. قام يصارخ :
( فطووووووووووووم ويهـــــــد .. فطووووووووووووم وطاعون .. فطووووم وايدز .. فطووووم وكسر ان شاء الله .. وينج انتتتتتتتي ؟؟!! خليتي باب الدار مفتوح نص سنتيمتر .. وهوا المكيف كله طلع برا وصار حرررر .. ما تحسين .. دمج بارد .. الله ياخذ اليوم اللي فكرت اخذج من اهلج فيه )
.
.
- مهند -
قاعد يقرا كتاب .. وفجاه ياته نور .. لابسه فستان يديد .. وصار هالحوار ..
نور : حبيبي شو رايك بالفستان الجديد ؟!
مهند : بيجنن عليكي ! اخذ من جمالك قطعـــه ..
- شباب الخليج -
قاعد يطالع مباراه ريال مدريد وبرشلونه .. طبعاً شبابنا مو مال كتب وثقافه !
و زوجته مستانسه بالفستان اليديد .. تبيه يشوفها .. طافت جدامه عشان يشوف .. وصار هالحوار :
الخليجي : قوووووووووووومي الله يخس هالويه ! ما تشوفيني اطالع المباراه ؟!
الزوجه : حبيبي شفيك .. كنت ابيك تشوف فستاني اليديد .. شرايك ؟!
الخليجي : وجذي تخربين علي المباراه .. ما شفت حركة رونالدينهو الحين طافتني كله منج !
الزوجه : انزين عاااد .. شرايك بالفستان ؟!
الخليجي : شالموضة الخايسه اللي طالعين فيها انتو يالبنات ؟! هذا فستان بذمتج ؟! لو لابسه خيشة البصل وايد احلى .. مخصره خيشة البصل ما تفرق !!
.
.
.
طبعا الفروق لو ييلس من الحين للصبح .. ما بخلص ..
لان 9000 درجه فرق .. ولكن شو نسوي .. الله كاتب لنا ان نجابل شبابنا
ونحتسب الاجر عند الله ..
الله ياجركم يا بنات الخليج ..
صدقوني .. كله اجر وثواب ..
